s. Teresa di Lisieux

SE NON DIVENTERETE COME BAMBINI ....

Lectio sancti Evangelii secundum Matthaeum 18:1-4
In illo tempore: Accesserunt discipuli ad Jesum, dicentes: Quis, putas, major est in regno caelorum. Et reliqua.

Homilia sancti Leonis papae

Sermo 37, in Epiphaniae solemn 7, cap 3-4

Tota, dilectissimi, Christianae sapientiae disciplina, non in abundantia verbi, non in astutia disputandi, neque in appetitu laudis et gloriae, sed in vera et voluntaria humilitate consistit, quam Dominus Jesus Christus ab utero Matris usque ad supplicium crucis pro omni fortitudine et elegit et docuit. Nam, cum discipuli ejus inter se, ut ait Evangelista, disquirerent quis eorum major esset in regno caelorum, vocavit parvulum, et statuit eum in medio eorum, et dixit: Amen dico vobis, nisi conversi fueritis et efficiamini sicut parvuli, non intrabitis in regnum caelorum. Quicumque ergo humiliaverit se sicut puer iste, hic major erit in regno caelorum. Amat Christus infantiam, quam primum et animo suscepit et corpore. Amat Christus infantiam, humilitatis magistram, innocentiae regulam, mansuetudinis formam. Amat Christus infantiam, ad quam majorum diligit mores, ad quam senum reducit aetates: et eos ad suum inclinat exemplum, quos ad regnum sublimat aeternum.

Ut autem plene valeamus agnoscere quomodo apprehendi possit tam mira conversio et in puerilem gradum qua nobis mutatione redeundum sit, doceat nos beatus Paulus et dicat: Nolite pueri effici sensibus, sed malitia parvuli estote. Non ergo ad ludicra infantiae et imperfecta nobis primordia revertendum est, sed aliquid, quod etiam graves annos deceat, inde sumendum, ut velox sit commotionum transitus citus ad pacem recursus: nulla sit memoria offensionis, nulla cupiditas dignitatis; amor sociae commmunionis, aequalitas naturalis. Magnum enim bonum est nocere non esse et maligna non sapere: quia inferre ac referee injuriam, mundi hujus prudentia est: nemini autem malum pro malo reddere, Christianae est aequanimitas infantia.

Ad hanc vos, dilectissimi, similitudinem parvulorum mysterium hodiernae festivitatis invitat; et hanc vobis humilitatis formam adoratus a Magis puer Salvator insinuat: qui, ut imitatoribus suis quid gloriae pararet, ostenderet, ortus sui tempore editos martyrio consecravit; ut in Bethlehem, ubi Christus natus est, geniti, per communionem aetatis consortes fierent passionis. Ametur igitur humilitas, et omnis a fidelibus vitetur elatio. Alter alterum sibi praeferat, et nemo quod suum est quaerat, sed quod alterius; ut, cum in omnibus abundaverit affectus benevolentiae, in nullo virus inveniatur invidiae; quoniam qui se exaltat humiliabitur, et qui se humiliat exaltabitur, eodem ipso testante Jesu Christo Domino nostro, qui cum Patre et Spiritu Sancto vivit et regnat in saecula saeculorum. Amen.

Orémus
Domine, qui dixisti: Nisi efficiamini sicut parvuli, non intrabitis in regnum caelorum: da nobis, quaesumus; ita sanctae Teresiae Virginis in humilitate et simplicitate cordis vestigia sectari, ut praemia consequamur aeterna. Qui vivis